阮浩棕早前在《隱形戰隊》中因飾演變態鏗少而彈出，為觀眾留下「嚇人」的印象，他在IG分享的不少劇照都目露兇光，非常可怕。不過隨住劇集播完，他的IG終於回復「清新」，近日他分享自己跟兩隻愛犬的合照，笑容燦爛一洗「兇」氣，而兩隻白雪雪的愛犬亦相當可愛狂吸Like！
阮浩棕接受《晴報》電話訪問，他表示兩隻愛犬都是比熊犬，兩兄弟分別叫Kyle同Casper，係同一胎兄弟。他說：「嚴格嚟講佢哋係我嘅侄仔，因為係我哥哥同呀嫂帶返嚟嘅，今年都10歲㗎啦！不過兩隻狗狗嘅性格好唔同！Kyle身形大隻啲，但係就比較細膽怕事，譬如佢每次聽到我媽媽煮餸時油煎炸嘅聲音，就會嚇到匿入房。而Casper外形會可愛啲，但就比較囂張，成日唔鍾意聽指令，就算用零食要佢『Sit』(坐下）同『Hand』（遞手手），佢個樣都會好唔樂意咁，好搞笑呀！」阮浩棕表示兩隻狗狗都好黐人，不過他在屋企就要「鏗少」上身，因為他負責管教，「只要佢哋兩隻一開始百厭，屋企人就會交畀我，一曳我爸爸就會嚇佢哋『叔叔嚟喇』，等佢哋冷靜番！」
阮浩棕多年前要中港兩邊走，經常都跟Kyle同Casper分隔兩地，難免都會掛住兩個「姪仔」，「最深刻係以前喺內地做嘢，每次離開屋企都有幾個月嘅時間，試過有一次我打開行李喼，佢哋即刻將最鍾意嘅玩具擺入去，好似畀個玩具代替佢陪我咁，真係好Sweet！嗰陣每次隔幾個月返到屋企，佢哋仲會好激動不斷咁撲上我身！」他笑言反而現時多留香港工作，就算拍完劇收工回家，都再沒有任何「福利」，事關狗狗已經習慣見到他，而且狗狗開始年紀大，精力有限。
阮浩棕視Kyle和Casper為重要的家人，特別是狗狗只有十幾年生命，作為主人就是他們的一切。見到狗狗比年輕時活力減少，難免擔心牠們會有返去「汪星」的一天。「未來嘅日子，我哋一家會繼續畀佢哋最好嘅照顧，而我都希望佢哋保持健康、開心、無憂無慮，繼續同我哋一齊愉快生活。」
Credit: skypost