名模蔣怡（Coco）為代言廚具產品升級當全方位代言人，今午舉行記者會時，靚女獲贈閃石刀座，而客戶更專程找來泰國設計師，為她以「Coco」設計logo，日後將套用於其產品系列，令她愛不釋手。
談到「升呢」酬金，她打趣：「其實我唔記得咗，但點都好過之前嘅，吸引囉，大家合作開心最緊要，同埋有機會出自己product都係value。（出啲乜產品？）乜廚房用到嘅都想出，都傾緊碗碟同枱布。」Coco又指5歲囝囝喜歡烹飪，所以她特別催促推出兒童用的保護切刀：「佢成日話要幫我切嘢，炒嘢佢又要幫手放材料，同埋每朝佢都鍾意同我沖咖啡，又跟爸爸學中式茗茶。其實我冇特別培養佢啲方面嘅興趣，佢自己鍾意咋。」
談到暑假在即，Coco表示打算相約朋友齊齊出埠旅行：「但仲諗緊，可能邊度都唔去，因為我哋鍾意咗玩帆船，尤其10歲囡囡玩得好叻，就嚟可以入代表隊出賽，我同老公好支持佢，所以一齊玩。」她又透露早前做了一次私房菜反應相當不俗：「依家好多人嚟同我傾，我又考到調酒師中級牌，廚藝學院方面，都應該就嚟攞到中級牌嘞。」
Credit: on.cc