蔡潔（Jacky）驚喜客串《新聞女王2》，飾演佘詩曼的養母、年輕版夏文汐（Madam阮雪君），向來予人溫文柔弱的蔡潔，昨晚（4日）身穿型格皮褸、駕着電單車霸氣登場，表情冷酷兼眼神銳利，被觀眾大讚刮目相看。
雖然蔡潔出場時間僅有一分鐘，但由於外形、尤其神情與夏文汐高度相似，吸引不少網民關注並引發正評，大讚劇組神來之筆，找來形神俱似的年輕版，談到飾演「霸氣夏文汐」年輕版，蔡潔坦言壓力不少：「因為夏姐姐喺我心目中超有型，有好強嘅霸氣，雖然我只係演佢年輕版亦好短篇幅，但我壓力都好大，因為其實都幾難，我有事前問劇組攞番夏姐姐拍咗嘅片嚟睇，嘗試模仿佢嘅身體語言，」
蔡潔雖然對白甚少兼出場時間短，但她仍有花心思做好細節位，例如在新聞採訪現場，即使趕著拍攝新聞照片，仍會不忘分心照顧養女，蔡潔亦坦言相關設計是源於對她對角色的想像：「因為我覺得佢收養得Man姐，證明佢都係好善良同錫個女，劇情亦顯示到出嚟，所以我就用咗自己嘅方式，加咗啲媽媽關懷囡囡嘅小細節落去。」
至於飾演Man姐佘詩曼的小演員李紫欣（Ashely），跟蔡潔有不少對手戲，日前李紫欣的家長出post分享幕後花絮，並驚爆蔡潔是李紫欣的契媽媽？李紫欣家長解釋道：「她是小文慧心的養母madam，也是我的契媽媽，契媽媽的名子是導演開的，Jacky姐姐講野（嘢）好溫柔好斯文..重（仲）有佢都好靚嫁（㗎），雖然佢真人好溫柔，但拍呢場拍得好有型。」