關嘉敏(Carman)在社交平台上載穿上紅色露肩晚裝的靚相，她坐在梳化上影相，期間擺出不少型格甫士，展示美好身材，又與一同主持Annual Dinner的拍檔李志剛合照，亦有分享做主持及表演時的照片，見她唱歌唱得非常投入！她寫道：「大家嘅氣氛好好，載歌載舞，搞到我都好Hyper！而我嘅拍檔係……認識十年 ！睇住我由跳唱歌手出道，尋晚第一次一齊做主持，感覺好奇妙！喂呀尋晚我真係好開心呀！」網民都大讚她一身打扮又靚又高貴。
Carman談到做晚會主持，她說：「其實我覺得幾正，因為我之前喺內地嘅綜藝有做過主持，學咗好多嘢。喺香港都有接一啲主持司儀嘅工作啦，我覺得最難唔係帶動氣氛，因為我本身個人都有啲natural high，但係我覺得最難係要跟稿讀，因為我成日都會爆好多唔係稿入邊嘅嘢，所以去到主持嘅時候，如果真係一啲好正式嘅場合，咁我就要讀多幾次稿，要準備多少少，要提自己唔好走偏咗，唔好冇啦啦natural high爆吓其他嘢、爆吓冷笑話咁樣，等自己可以正經啲嘅。」她表示今次都好有難度：「因為我係第一次做中、英雙語嘅司儀，對我嚟講係比較難，好彩呀有李志剛喺度就非常好啦，佢又好識帶動氣氛，其實我同佢拍檔呢，我都喺佢身上學咗好多嘢。」
她表示與李志剛已相識10年：「咁啱呢間公司搵咗我同佢拍，我真係勁開心、超開心！因為10年前係佢睇住我出道，跟住之後就去電台度接受他訪問。然後10年之後，我哋企喺同一個台度，一齊做司儀，一齊喺度跳舞唱歌，一齊喺度搞氣氛，一齊工作。我覺得呢個真係好神奇嘅一個緣分！」不過，她自覺做錯決定：「呢條裙雖然好靚，但係我唔應該揀條拖尾嘅裙，搞到我Hyper唔到，幾驚畀人踩，我最後仲將條裙尾搭住咗喺個身度，咁啱佢哋公司有個最佳衣着獎，因為佢哋係印度人，咁我將個拖尾搭咗喺自己個膊頭度，咁就真係變咗一件類似印度衫咁囉！咁都幾搞笑嘅，咁啱同佢哋一齊行出嚟Catwalk，成件事好得意。」