由視后林夏薇主演嘅電視劇《寵愛PetPet》，於劇中飾演獸醫「金惠婷」嘅佢，更同飾演「汪聲仁」嘅周嘉洛大玩姊弟戀。雖然劇集播出前，有唔少網友擔心2人年紀相差8年會有違和感，不過隨着首集播出，淡妝上鏡嘅林夏薇亦少女感十足，白滑粉嫩嘅肌膚同Fit到漏嘅苗條好身材，認真回春有術之餘，同周嘉洛搭配嘅「歡喜冤家」更笑料百出，首集播出就大獲好評。
而劇中性格Mean到爆嘅林夏薇，更一改平日嘅溫柔淑女形象，化身成「女漢子」嘅佢，更喺第一集已經有「動作戲」爬水渠，利落身手相當搶Fo。而尋晚，隨着劇集播出，林夏薇亦喺社交網晒一段花絮，並寫道：「第一集金醫生已經有動作戲。」只見林夏薇吊晒威也之餘雙手更貼滿白色膠布，引嚟唔少網友心痛以為女神拍劇受傷，好彩只係保護措施，而精彩又爆笑嘅演出亦引嚟唔少網友激讚外，仲有網友留言：「薇薇真係好勁，超勇敢！不如下次拍埋打戲！」、「第一集就變特技演員！」、「睇過你扮演警察律師...今次係醫生，下次會唔會有幸見到你演消防員？一定好型好精彩！」
薇薇笑言對此印象深刻：「因為要喺幾層樓高嘅外層爬，感覺好真實。最大難度係天氣好炎熱，仲要吊威吔着住好多層衫，當時有少少中暑嘅感覺，好彩現場嘅武指好貼心，見到我暈暈哋，就攞汽水畀我飲，好感動！其實我都好鍾意吊威吔，但就冇乜機會拍打戲，對上一次已經係2013年嘅《寒山潛龍》。」談到與嘉洛於劇中譜姊弟戀，薇薇笑言：「第一次同嘉洛合作，開頭唔知對手係佢，後尾知道係佢之後即刻諗：『吓，咁細個？得唔得㗎？』而現實中我就冇接觸過姊弟戀，拍攝時同佢都有諗過大家點樣夾會好啲，一開工就覺得默契幾好，佢係一個好靈活嘅創作型藝人。」
Credit: on.cc