陳山聰與葉蒨文（Sophie）今日（11日）到亞博《香港國際汽車博覽(IMXpo)》出席新車發布會，山聰為MG擔任銷售總監，向傳媒介紹全新發布之電動旅行車S6。西裝骨骨現身的陳山聰笑言今日扮演總裁，談起現時流行電動車，出名廿四孝爸爸的他表示自己買車最重要考慮仔仔Jaco的需要，他説：「當然最緊要係安全性，同後座要夠寬闊，因為Jaco要坐兒童安全座椅，仲有尾箱要大，因為要放Jaco嘅單車，基本上架車大部分都係屬於佢嘅，哈哈！」他笑稱自己是實用型會等優惠才考慮，因希望將錢留給仔仔。
山聰又開心透露已收到通知，下年升小學的仔仔，成功獲心儀小學取錄，作為父母最緊張莫過於小朋友的學業，得知消息與太太也感到很安慰，他笑謂：「同佢面試嗰陣我仲緊張過佢，又唔可以陪佢入去，坐喺出面等又擔心佢答得好唔好，我太太都叫我唔好咁緊張，有返30年前去TVB面試嗰陣嘅感覺。」他笑言要更加努力搵錢，預備替仔仔請補習老師。談到他早前跟陳百祥的「香港精裝明星足球隊」到內地踢足球，對方曾揚言該隊在內地很受歡迎，每位跟他去踢足球的藝員，商演機會激增20倍，問到他事後是否也多了商演？山聰笑言因平日工作忙，該次也只是剛巧有時間才去客串玩玩一場開心足球而已。
早前山聰跟梁烈唯、林盛斌等到馬來西亞登台，剛巧他們於當地合作的賀歲片《媽媽又要嫁》完成後期製作，故順道跟其他投資者一起看試片，該片會於大年初一在當地上映，稍後他會忙到馬來西亞吉隆坡、馬六甲及檳城等走訪為電影宣傳，之後回港跟家人吃團年飯後，再帶太太跟仔仔到當地，出席謝票兼過新年，因當地天氣適合游泳啱晒仔仔。提到他有份投資該片是老闆之一，他謙稱只屬小小投資者，是一個新嘗試，希望票房理想，便可以有開拍下一部的機會。