在無綫戀愛綜藝真人騷節目《女神配對計劃》中的關嘉敏（Carman）雖然尚未「脫單」成功，不過日日都有愛犬Two Two相伴，昨日（23號）她在社交網上載新相，穿上低胸裝加皮短褲褲十分性感，而Two Two就乖乖在主人身邊任由擺布。
Carman表示和狗狗影相有難度：「平時我影相都算快嘅，不過同Two Two一齊就需要多啲時間，最搞笑係佢影到發脾氣，喺人哋Studio瀨尿，不過整體嚟講佢都算乖，好配合。」至於和Two Two影寫真亦算是圓心願，因之前的愛犬意外離世後，才發覺跟亡犬的合照少之又少，所以趁Two Two健康又靚女時要爭取機會留倩影。問可會培育愛犬做「狗明星」，她表示：「我都想有多啲人搵Two Two做嘢，但做狗明星好難，同埋我自己管理自己都未掂，點做佢經理人？」
另外，她又在社交網為「中年好聲音3」季軍劉洋的新歌《別離開我》MV宣傳，分享跟劉洋及樂隊Mr.成員Ronny（黎澤恩）的合照，Carman謂榮幸有機會擔任MV女主角，更爆自從入行後，再沒有歌手邀她拍MV，所以當日拍得特別開心，又多謝劉洋的MV導演遷就其檔期：「嗰日要晨早6點去到坪洲，中間畀我偷走兩個鐘去接其他Job，之後再返轉頭繼續拍攝，最難忘係劉洋一見到我就同我講佢有睇我扮譚輝智，仲話冇諗過『女版譚輝智』會出現喺佢個MV度。」