由視后林夏薇（薇薇）及周嘉洛主演的無綫電視劇《寵愛Pet Pet》現正熱播中，開播至今，劇集贏盡口碑，兩位男女主角歡喜冤家演技擦出不少火花，CP感十足！

林夏薇接受本網專訪時，表示很開心可以演繹獸醫「金惠婷」一角：「我自己有養開寵物好多年，本身有三隻狗，都有少少養狗嘅經驗，但係動物真係好難拍，所以近呢幾年都好少呢方面嘅題材，今次可以俾我試到做獸醫，又可以同咁多動物一齊，真係一件好開心嘅事。」不過，薇薇指拍攝《寵愛》時曾遇阻滯：「嗰陣時我拍緊《法言人》，因為疫情撞咗期，我幾驚接唔到啊，我係好想開呢套劇，所以一直排除萬難，好在兩邊嘅劇組都好好，監製兩邊都就到時間，最後成功可以拍到呢套劇。」

薇薇表示劇中不時要與動物做對手，當中存在不少挑戰，幸好今次劇中飼養的「冬甩」十分聽話，拍攝時才能順利完成：「我之前都有試過同貓狗做對手，但只係一隻囉，而我哋今次嘅難度係劇中有多種動物，最少70隻，所以我覺得監製都好犀利，每一日個廠都出現唔同品種嘅動物，好似鸚鵡、蛇同守宮等等。」但她坦言不忍心帶自己的狗狗來客串劇集：「我要專心拍劇，好難兼顧佢哋，同埋拍攝同玩唔同，都唔想佢哋咁辛苦。」

薇薇指拍攝《寵愛》期間感觸良多：「我覺得係天意，因為喺拍呢套劇之前，我其中一隻狗『金豬』嗰陣時做咗好大嘅手術，嗰段時間我最深刻嘅印象，就係我驚佢過唔到呢關。」她感嘆表示：「拍《寵愛》令到我再去經歷多一次，知道點樣去照顧狗狗，仲有同狗狗相處，將嗰種愛同埋心靈相通嘅感覺擺落劇入面，就更加有感觸。」薇薇又指因為「金豬」病了而寫下歌曲《因為有你》，最後獲監製錄用成為劇集插曲，令她覺得與劇集更添緣分：「監製話我首歌好啱套劇，因為歌詞嘅內容就係寫你有好多選擇，但對於狗狗嚟講，主人就係佢嘅唯一，所以我哋好想通過呢套劇去帶出正能量俾大家，希望大家會愛護動物，做個負責任嘅主人，唔好遺棄動物啦！」

她又指通過拍攝學習了不少關於動物的新知識：「例如劇中有講到『冬甩』做絕育手術，我現實係有帶我隻『菠蘿』去做絕育手術，我一路拍嘅時候，我會反思係咪冇考慮過佢嘅感受？我自己覺得咁樣係為佢好，但又係咪真呢？」

講到與周嘉洛首度合作，兩人在劇中更譜出姊弟戀，薇薇坦言曾嫌嘉洛太細個：「其實第一時間知道我同嘉洛做情侶，我都有啲擔心會唔會好怪，因為我現實生活上冇接觸過姐弟戀，身邊啲朋友全部都大過我。」薇薇指《寵愛》是她從影以來首部甜寵劇：「我之前拍開嘅劇種都係劇情片、正劇多啲，未試過拍一套劇係要咁sweet，仲要係姐弟戀，但估唔到我哋一開工就非常之咁有默契，呢個令到我好驚喜！」薇薇透露與周嘉洛為增加CP感，兩人私下構思了不少「小巧思」：「我哋做咗好多功課，睇吓點樣可以再夾得好啲，我哋係細緻到連啲衫都要夾好晒，所以出到嚟個默契都幾好啊！我哋每日最開心就係去到現場，大家再去度啲橋，點樣去令到畫面再sweet啲！」

在訪問中，薇薇對新拍檔讚不絕口，表示很期待能與嘉洛再度合作：「嘉洛本身唔識我，以為我係一個好正經嘅人，佢話估唔到我仲癲過佢，喺現場反而佢似哥哥多啲。」講到對於「金汪CP」大受網民歡迎，薇薇笑言：「證明咗觀眾都開始代入我哋呢個新CP，係一件好開心嘅事，好多網民會覺得有啲似韓劇《經常請吃飯的漂亮姐姐》，但係我哋係唔會輸蝕嘅，大家期待啦！」

Credit: bastillepost

林夏薇首拍甜寵劇《寵愛Pet Pet》 開心與周嘉洛組「金汪CP」廣受觀眾歡迎

林夏薇首拍甜寵劇《寵愛Pet Pet》開心與周嘉洛組「金汪CP」廣受觀眾歡迎