黃宗澤(Bosco)、佘詩曼、馬國明、高海寧、譚俊彥、夏文汐、王敏奕、陳曉華等到中環出席無綫台慶劇《新聞女王2》宣傳，Bosco與阿佘20年來只在古裝劇《覆雨翻雲》同劇但沒對手戲，今次終於有對手戲，Bosco坦言感覺很新鮮，拍劇前收指示要激死好多女人，阿佘笑言經常被他寸，2人更會即場改對白，好多火花。
Bosco表示：「其實做呢個角色好過癮，因為現實生活係唔會成日去鬧人，如果係咁樣實俾人殺咗啦，呢個咁鬼衰嘅人。」阿佘笑言：「我覺得佢平時都係咁。」Bosco接著說：「我都係本色演出啦。」阿佘又說：「其實我好羨慕你，因為你嘅角色好好玩，我都想試一試，因為發揮空間都好大。而佢呢個角色能力係高，係幫公司搵錢，但把口就衰。今次同佢係首次合作，估唔到畀件咁筍嘅嘢俾我。（筍喺邊度先？）筍喺佢把口度，成日都好想掌佢個嘴，哈哈！」
兩人亦表示今次合作不夠喉，希望有機會開拍第三輯繼續鬥嘴。阿佘又投訴只飲過Bosco煲一次湯，而且無湯料，他否認稱花膠沉在湯壺底。談到馬國明的角色在首集即死，阿佘笑指Bosco劇中把口衰，相信同樣沒好下場。
二人前一晚現身《東張西望》做主持，阿佘坦言緊張所以有甩轆的情況，希望觀眾理解他們並非專業，她表示入行以來做主持工作，只有當年選完港姐為《仁濟》活動做主持，緊張到瘦了5磅，之後要求經理人別再安排這類型工作。