由阮兆祥、王祖藍、李思捷主持嘅TVB扮嘢真人騷《福祿壽訓練學院》，日前（23日）播出嘅一集就係三隊學員進行最後一輪嘅「命運對決」，比賽以抽簽形式進行一對一扮嘢對決，贏嘅一方可以直接晉級，而輸嘅一方就進入危險區。
日前嘅表演分別有趙頌宜扮「菜琴」演出「夜上海的一個吻」VS葉泓聲扮Dicky Yip演出「西遊記」、梁山山扮「山寨華健」演出「不花心的華健」VS吳兆麟扮「詠春師徒」演出「功夫傳人」，以及陳柏曦演出「追‧憶張國榮」VS關嘉敏扮「橫菲」演出「菲越電視城」。喺6個表演中，當中以關嘉敏扮演嘅「橫菲」最為精彩，無論係眼神、造型定係演出都係100%神還原王菲嘅《夢中人》。喺演出中，關嘉敏首先喺化妝間獻唱《夢中人》，期間不停擺出王菲嘅招牌動作，再加上佢將太陽眼鏡「戴低一格」並低頭四處張望，之後佢跳脫地跑到錄影廠，繼續又唱又跳，連評判都給予正評。
節目出街後，唔少網民紛紛留言大讚佢神相似程度幾可亂真，例如「嘉敏真係100%似王菲, 開頭我還以為 返播 王菲的舊片 .... 睇咗超過10秒 才發覺原來唔係王菲... 勁嘢」、「一開始就以為是放王菲舊音樂片, 關嘉敏確實扮到入型入格, 思捷好野發掘到亮點. 關嘉敏總決賽希望再有突破.」、「關嘉敏真係可以以假亂真 好似呀」、「扮王菲真係神似 唔講以為王菲來了 歌也唱得不錯」、「關嘉敏真係100%似王菲」、「好鬼似王菲」、「似到癲」、「嗰種眼神 dup頭的反應 似到癲咗」及「真心似！關嘉敏加油」等等；不過亦有網民認為唔相似及做作，留言話「關嘉敏都唔係live唱，係啲化妝師好啫。好扮嘢，完咗評分仲喺度迷幻mode,賴係投入角色。好做作」、「扮鬼到王菲咩。王菲咁高氣質咁獨特唱腔。淨係見到喺到白卡發花癲」、「白卡版王菲」、「王菲唔係咁的，佢好似食咗迷藥咁」及「好難聽」等等。
credit: Yahoo新聞